NRG-II Meeting

Legaspi Village, Makati City (The Philippines), May 22, 2014

Polisa sa kompetisyon sa bugas kag transportasyon kinahanglan
PIA.gov.ph, June 16, 2014

Ginakinahanglan ang isa ka polisa sa kompetisyon para sa mga sektor sang bugas kag transportasyon agud nga maengganyo ang kabag-ohanan kag matapna ang pagluntad sang mga cartel.

Sa pihak nga bahin, ginrekomendar ang ginatawag nga mga “tendered service contracts” ukon “concessions” sa pinili nga mga rota sa bahin sang sektor sang transportasyon.

Ini ang pila sang mga bagay nga gindiskusyonan sa tion sang isa ka sinapul nga ginpatigayon sang Philippine Institute for Development Studies (PIDS) kaupod ang Consumer Unity and Trust Society (CUTS) International nga na-base saJaipur, India kag ang Action for Economic Reforms (AER) kag gintambungan sang nanuhaytuhay nga mga lideres sang ila mga sektor.

Gintudlo ni PIDS Senior Researcher Fellow kag Competition Reforms in Key Market for Enhancing Social and Economic Welfare in Developing Countries (CREW) Project Director Dr. Roehlano Briones nga dapat nga mag-adoptar ang pungsod sang mas bukas nga polisa sa bahin sang mga ginabakal sa luas nga bugas.

Ini ang tuhay sa nagaluntad subong sa pungsod kon sa diin nagakatabo ang “import monopoly” agud nga mapahamtang ang istabilidad sa presyo sang lokal nga bugas kag kon diin mismo ang gobyerno ang may kahimuan sini.

Ang ginakabig import monopoly ang ginapamatud-an sang nagakatabo sa aktwal ngasitwasyon kon sa diin pila lamang sang mga negosyante sa industriya sang bugas ang ginapahanugutan nga magbakal sang bugas sa luas halin sa minimum nga 2,000 metriko tonelada tubtub sa 5,000 metriko tonelada.

May pagtuon nga gintudlo si Briones nga nagarekomendar sang pagpahanugot sa magagmay nga negosyante nga magbakal man sa luas halin sa 10 tubtub20 ka metriko tonelada agud nga malikawan ang monopoliya.

Sa bahin sang sektor sang transportasyon, ginrekomendar ni PIDS Senior Research Fellow Dr. Adoracion Navarro ang pagtilaw sa pag-adoptar sa Metro Manila, nga sentro sang pungsod, sang “tendered service contracts” ukon concessions sa pinili nga mga rota. Ang kita gikan sa sini nga mga rota ang kauhaan sang igabayad sa mga operator sang bus.

Ini agud malikawan ang komplikado nga sistema sang sektor kon sa diin nanuhaytuhay nga mga ahensya ang nagapatuman sang mga pagsulondan sa trapiko nga nagaresulta kon kaisa sang mga problema nga indi maayo para sa sektor.

Ang ginhiwat nga sinapul ang kabahin sang mga hilikuton sang PIDS, CUTS kag AER sa bahin sang Competition Reforms in Key Markets for Enhancing Social Economic Welfare in Developing Countries ukon CREW. (PIDS/JCM/JSC-PIA6).

This news item can also be viewed at:

http://news.pia.gov.ph/